2023 жылдың 29 мамырында «Қазақстан халқына» ҚҚ Қамқоршылық кеңесінің кезекті бетпе-бет отырысы өтті. Онда келесі шешімдер қабылданды:
1. «QH балалар нейрохирургиялық қызметін дамыту» қайырымдылық жобасы бекітілді. Жоба еліміздің 18 өңірінің нейрохирургтеріне арналған оқыту іс-шараларының кешенін жүргізу арқылы аймақтардағы балаларға көрсетілетін мамандандырылған және жоғары технологиялық нейрохирургиялық көмектің қолжетімділігін жақсартады және сапасын арттырады.
Қауіпсіз нейрохирургиялық емдеудің заманауи технологияларын трансферттеу үшін жағдайлар жасалады. «Ұлттық нейрохирургия орталығы» АҚ өңірлерде операция кезінде науқастарды қауіпсіз нейрохирургиялық емдеу бойынша заманауи тәжірибелер мен тәсілдер трансфертін жалғастыруға мүмкіндік алады. Бұл орталыққа жоспарлы нейрохирургиялық көмекке күту парағындағы кезектілікті біртіндеп төмендетеді.
Сондай-ақ, жобаның «Ұлттық нейрохирургия орталығы» АҚ-ға гибридті операция бөлмесінде ми патологиясы кезінде нейрохирургияның заманауи жоғары технологиялық әдістерін енгізу міндеті бар.
Өңірлерде нейрохирургтер санының артуымен өңірлерден мамандарды оқыту және медициналық технологиялар трансферті арқылы балаларға нейрохирургиялық қызметтерге қолжетімділікті жақсарту мүмкіндігі пайда болды. Бұл ретте, балалар нейрохирургиялық төсектері бар 21 денсаулық сақтау ұйымында тиісті жабдық (қазіргі заманғы краниотомдар және нейромониторинг) жетіспейді, бұл өз кезегінде «қауіпсіз хирургия» технологиясының трансфертін жүзеге асыруға мүмкіндік бермейді.
«Қазақстан халқына» қоры жобаны іске асыру аясында балалар нейрохирургиялық қызметін дамыту үшін медициналық жабдықтар сатып алу бойынша қайырымдылық көмек көрсетеді. Еліміздің 18 өңірінде ауруханалардың нейрохирургиялық бөлімшелерін жалпы құны 3,43 млрд теңгеге жабдықтау көзделген.
Жобада нейромониторинг, бейнеэндоскопиялық тіректер, краниотомдар, нейрохирургиялық құралдар жиынтығы, басын бекіту жүйесі бар операциялық үстелдер, қос жоспарлы ангиографиялық жүйесі бар гибридті операциялық бөлме бөлігінде жарақтандыру жоспарлануда.
Ақмола, Алматы, Абай, Ақтөбе, Атырау, Жамбыл, Қарағанды, Қостанай, Қызылорда, Шығыс Қазақстан, Батыс Қазақстан, Маңғыстау, Павлодар, Ұлытау, Солтүстік Қазақстан, Түркістан облыстарының, сондай-ақ Астана және Алматы қалаларындағы барлығы 21 медициналық ұйым жобаның қайырымдылық алушылары болып айқындалды.
2. «QH Аудандық оңалту орталықтары» қайырымдылық жобасы бекітілді. Жоба мамандарға оңалтудың тиімді әдістеріне оқытуды жүргізе отырып, 19 аудандық оңалту орталығын ашу және жабдықтармен жарақтандыру арқылы мүмкіндігі шектеулі балаларды кешенді оңалту көмегімен қамтамасыз етуге бағытталған.
Мүгедектігі бар балалардың саны жылына шамамен 3000-4000-ға өседі. Тек өткен жылы 13 мың баланың бастапқы мүгедектігі анықталды. Олардың өмір сүру сапасы мен әлеуметтенуін жақсарту үшін, ең алдымен, оңалту үнемі қолжетімді болуы керек. Осыған байланысты, әкімдіктердің өтініші бойынша қазіргі заманғы талаптарға жауап беретін, атап айтқанда тиісті оқытудан өткен мамандары бар және жабдықтармен қамтамасыз етілген оңалту орталықтарына жоғары қажеттілік байқалады.
Оңалту орталықтары мемлекеттік денсаулық сақтау мекемелерінің базасында құрылады, сондай-ақ 551 маман оқытылады, олар 19 аудан орталықтарында жұмыс істейтін болады.
Қор орталықтарды жарақтандыруды қаржыландырады, алдын ала бюджеті – 4,58 млрд теңге. Бұл ретте оңалту орталықтарын жарақтандыру құны жобаның екінші кезеңінде Қамқоршылық кеңестің жекелеген шешімдері негізінде қосымша бекітіледі.
Облыс әкімдіктері оңалту орталықтары үшін инфрақұрылым мен мамандарды іріктеуді жүзеге асырады, оңалту орталықтарын жөндеуді қаржыландырады. Жоба серіктестері – «Қамқорлық Қоры» КҚ және «Нұрсұлтан Назарбаев Қоры» ЖҚ.
3. Жылдам салынатын модульдік спорт залдарын орнату арқылы ауылдық жерлерде, моно- және шағын қалаларда спорттық инфрақұрылымды дамыту тәсілдері бекітілді.
Қазақстан Республикасы Үкіметінің 2023 жылғы 28 наурыздағы №251 қаулысымен бекітілген Қазақстан Республикасының дене шынықтыру мен спортты дамытудың 2023-2029 жылдарға арналған тұжырымдамасына сәйкес, бұқаралық спортты халық арасында танымал ету салауатты ұлтты қалыптастырудың кілті болып табылады. Бұқаралық спорттың жеткіліксіз дамуының негізгі себептерінің бірі – спорттық инфрақұрылымның жетіспеушілігі немесе тозуы. Өткен жылдар ішінде мемлекет өңірлердегі дене шынықтыру мен спорттың материалдық-техникалық базасының жай-күйіне тиісті түрде назар аудармады, нысандарды түгендеу жүргізілмеді, спорттық мүкәммалды жаңартуға қаражат бөлінбеді.
Мәдениет және спорт министрлігінің әдістемесіне сәйкес, залдардың ең төменгі стандарты 1581200,3 шаршы метрді құраса, ел бойынша спорт залдарындағы тапшылық 448428,4 шаршы метрден асады.
Дене шынықтыру мен спортты дамыту тұжырымдамасында спорттық инфрақұрылымның негізгі өсуі жазықтық құрылыстар есебінен жүретіні атап өтілді. Республика бойынша жабық спорт ғимараттарының саны жеткіліксіз болып қалуда. Бұл ретте елде спорт нысандарының болуы олардың барлық азаматтар үшін, әсіресе ауылдағы халық үшін қолжетімді емес.
Қор келесі тәсілдерге сәйкес еліміз бойынша жылдам салынатын модульдік спорт залдарын орнатуды қаржыландырады:
1)командалық спорт түрлеріне арналған (футзал, баскетбол, волейбол, гандбол) жабыны бар 25х55 метр көлеміндегі спорт залдар;
2) тек ауылдық елді мекендерде, моно- және шағын қалаларда орнату;
3) келесідей шарттар сақталған кезде Алматы, Астана және Шымкент қалалары есепке алынбауы мүмкін:
- ерекше қажеттіліктері бар балаларға бағытталған спорт секциясының өзіндік оқу бағдарламасының болуы;
- қала құрамына 2013 жылдан ерте енгізілген бұрынғы ауылдық аумақ;
4) спорт залдардың жалпы саны 80-ге дейін, соның ішінде әрбір облысқа, республикалық маңызы бар қалаға, астанаға 4 спорт залдан.
5) толығымен жабдықталатын спорт залдың құны 175 млн теңгеден аспайды.
4. «Coursera – қазақ тіліне» қайырымдылық жобасына өзгерістер енгізілді. Қордың 654 курсты аударуды қаржыландыруын алып тастау бөлігінде, Қордың жобаға қатысу құны 2 460 472 070 теңгеден 853 569 585 теңгеге дейін төмендейді. 2023 жылғы 24 сәуірде Қазақстан Республикасы Ғылым және жоғары білім министрлігінен «BMG UpSkill» ЖШС-ні серіктес ретінде қолдау, жобаны жүзеге асыруға үлес қосу негізінде «Coursera» білім беру платформасының курстарын өз қаражаты есебінен қазақ тіліне аудару туралы хат келіп түсті.
