QH Цифрлық технологияларды пайдалана отырып, Ақтөбе облысының шағын жинақты ауылдық мектептерінің әлеуетін дамыту

Қайырымдылық жобасының мақсаты - Ақтөбе облысының шағын жинақты мектептеріне цифрлық технологияларды енгізу арқылы білім беру сапасы мен оқыту тиімділігін арттыру.

1. Жоғары жылдамдықты интернетпен қамтамасыз ету арқылы 134 ШЖМ-де онлайн/офлайн оқытуды ұйымдастыру үшін жағдайлар жасау;
2. Ақтөбе облысының 134 шағын жинақты мектептерін жабдықтау;
3. Оқушылардың, педагогтердің, шағын жинақты мектептер әкімшілігінің цифрлық оқу материалдарына: оқыту платформаларына, цифрлық білім беру ресурстарына қол жеткізуін қамтамасыз ету.
4. Шағын жинақталған мектептерді дамытуда тірек мектептердің мүмкіндіктерін пайдалану. Тірек мектептер мен шағын жинақты мектептердің өзара іс-қимыл тетігін әзірлеу.
5. Бірлескен сыныптарда жұмыс істейтін педагогтердің әдістемесі мен ғылыми-әдістемелік қолдауын әзірлеу.
6. Оқу процесінде цифрлық шешімдерді пайдалану бойынша педагогтердің дағдылары мен құзыреттерін арттыру.
7. НҚА жетілдіру және басқа өңірлерде жобаны тарату бойынша ұсынымдар әзірлеу.

жобаның жалпы бюджеті 4 063 255 771 теңге, Қордың қатысуы жалпы сомасы 2 064 199 025 теңгеге 134 шағын жинақты мектепті жабдықтау бөлігінде көзделген.

Қазақстан Республикасы Президентінің "Әділетті Қазақстан: бәріміз және әрқайсымыз үшін. Қазір және әрдайым" сайлауалды бағдарламасында пәндерді оқытудың инновациялық тәсілдерін енгізу, қажетті оқу материалдарын цифрлық форматқа көшіру бойынша іс-шара көзделген.

Осы тармақты орындау шеңберінде Қазақстан Республикасының Оқу-ағарту министрлігі Қазақстан Республикасының цифрлық даму, инновациялар және аэроғарыш өнеркәсібі министрлігімен бірлесіп, Жол картасын әзірледі, онда цифрлық кабинеттермен қамтамасыз ету жолымен шағын жинақты мектептерде инновациялық технологияларды енгізу және білім беру процесін цифрландыру жөніндегі пилоттық жобаны іске асыру үшін Ақтөбе облысы айқындалған.

Бүгінгі таңда ауылдық мектептегі білім сапасы елдегі орташа деңгейден төмен. Бұған халықаралық салыстырмалы зерттеулер (TALIS, PISA, PIRLS) және білім алушылардың білімін бағалаудың ұлттық жүйелері (ҰБТ, ОЖСБ) дәлел бола алады. PISA-2018 нәтижелеріне сәйкес қала мен ауыл арасында білім беру сапасында 22-ден 37 баллға дейін алшақтық бар. Бұл ауыл мен қала оқушылары арасындағы оқу жетістіктеріндегі айырмашылықтың артқанын көрсетеді.

Сонымен қатар, білім беру сапасына әсер ететін маңызды факторлардың бірі мектептің материалдық-техникалық базасының деңгейі болып табылады.

Оқу процесінде білім беру сапасын арттыру үшін цифрлық кабинеттердің болуы және интерактивті жабдықтарды пайдалану қажет. Алайда, деректер көрсеткендей, ШЖМ-де цифрлық кабинеттер мен басқа да интерактивті жабдықтар тым жеткіліксіз.

Шағын жинақталған мектептерде білім сапасының төмендігінің келесі негізгі себептері анықталды:

               - жеке ШЖМ-де интернеттің жылдамдығы төмен немесе мүлде болмауы, мұғалімге уақыт талаптарына сай болуға, білім алушылардың сұраныстарына сәйкес сабаққа толық дайындалуға және олардың кең спектрлі дағдыларын дамытуға мүмкіндік бермейді;

• - цифрлық оқу жабдықтарымен жабдықталуының төмендігі, әртүрлі форматтағы сабақтарды жүргізуге және цифрлық технологиялар мен білім беру ресурстарын пайдалануға, сондай-ақ оқушыларға қосымша білім беруді ұйымдастыру үшін жағдай жасауға мүмкіндік бермейді;

- оқытудың біркелкі формалары мен әдістеріне байланысты оқушылардың мотивациясы төмен.

Осыған байланысты осы жобаны іске асыру қажеттілігі туындады.

Ақтөбе облысының 134 шағын жинақты мектебінің 1-11 сынып оқушылары.

Жобаны іске асыру шағын жинақты мектептерде онлайн/офлайн оқытуды ұйымдастыру үшін жағдай жасауға мүмкіндік береді: жоғары жылдамдықты интернетпен ("Физика", "Химия", "Биология", "Математика", "ағылшын тілі"), оқушылардың, педагогтердің, ШЖМ әкімшілігінің цифрлық оқу материалдарына қолжетімділігін қамтамасыз ету, тірек мектептер мен ШЖМ өзара іс-қимыл тетіктерін сынақтан өткізу. Сондай-ақ цифрлық шешімдерді қолдана отырып, оқыту мен оқудың тиімділігіне мониторинг жүргізілетін болады, НҚА жетілдіру жөнінде ұсыныстар дайындалады және Қазақстан Республикасының басқа өңірлерінде жобаны тарату жөнінде ұсынымдар әзірленеді.

Жоба аясында Ақтөбе облысының 134 шағын жинақты мектебінде материалдық-техникалық база жаңартылады, оның ішінде:

- 80-нен астам балалар контингенті бар 21 шағын жинақты мектеп онлайн оқытуды ұйымдастыруға және робототехника сабақтарын өткізуге арналған 1 кабинетті және биология, химия, физика пәндерін оқытуды ұйымдастыруға арналған 1 кабинетті жабдықтайды.

- Контингенті 80-нен кем 113 ШЖМ-ке онлайн оқытуды ұйымдастыруға, робототехника және биология, химия, физика пәндері бойынша сабақ өткізуге арналған жабдықтармен 1 біріктірілген кабинет беріледі.

Жабдықтаудан басқа, жоба шеңберінде мынадай мәселелерді шешу жоспарлануда:

- ШЖМ педагогтерінің кәсіби дамуы;

-  Оқу процесіне қатысушылардың АКТ дағдыларын дамыту: оқушылар, мұғалімдер және мектеп әкімшілігі;

- "Физика", "Химия", "Биология"пәндері бойынша ШЖМ оқушыларында практикалық және зертханалық жұмыстарды жүргізу дағдыларын дамыту. Виртуалды тренажерларды қолдану арқылы тәжірибе жинау;

-  Тірек, магниттік мектептер ресурстарын және командалық жұмыс дағдыларын шоғырландыру арқылы ШЖМ оқушыларының ғылыми-зерттеу және жобалау жұмыстарын жүргізу дағдыларын дамыту;

-  Оқушылардың білім беру нәтижелерін арттыру: оқу жылының басында және соңында оқушылардың оқу жетістіктерін бақылау (6, 8, 10 сыныптар).

Жоба 3 кезеңнен тұрады (дәйекті және / немесе параллель болуы мүмкін):

1. Жеткілікті жоғары жылдамдықты интернетпен және мектеп кадрларымен қамтамасыз ету.
2. Ақтөбе облысының 134 шағын жинақты мектептерін жабдықтау.
3. Оқу процесін ұйымдастырудың 4 моделін қолдана отырып, 134 ШЖМ-де онлайн/офлайн оқытуды ұйымдастыру.

Жобаны іске асыру кезеңі: 2023-2024 жылдар.