Қазақстан Республикасы Парламенті Мәжілісінің Әлеуметтік-мәдени даму комитетінің төрағасы Асхат Аймағамбетов пен «Қазақстан халқына» қорының басқарма төрағасы Болат Жәмішев Қазақ онкология және радиология ғылыми-зерттеу институтына (ҚазОРҒЗИ) келді.
Сапар барысында еліміздегі жетекші ғылыми-медициналық, ұйымдастыру-әдістемелік онкологиялық орталықтың басшысы, медицина ғылымдарының докторы Диляра Қайдарова жұмыс нәтижесімен таныстырды.
Ол «Қазақстан халқына» қоғамдық қорының қолдауымен еліміздегі онкологиялық көмектің сапасын арттыруда және ел азаматтарына заманауи диагностика мен емдеу әдістерінің қолжетімділігін арттыруда айтарлықтай жетістіктерге қол жеткізілгенін атап өтті.
Мысалы, 2023 жылдың күзінде ҚазОРҒЗИ-да қатерлі ісіктеріне жоғары технологиялық операцияларды жасауға арналған StealtStation S8 Premium нейронавигациялық жүйесі пайдалануға берілді. Қазіргі уақытта Ethos сәулелік терапия кешенін және Siemens SOMATOM go.Sim компьютерлік томографын орнату жұмыстары аяқталуда.
Жаңа құрал-жабдықтың жоғары дәлдігі мен бейімделгіштігінің арқасында емдеу жылдамырақ және аз сеанстарды қажет етеді, бұл пациенттердің күту уақытын қысқартады, пациенттерді сәулелік терапиямен қамтуды арттырады және медициналық мекемелерге түсетін жүктемені азайтады.
Бюджеті 19,8 млрд теңгені құрайтын «QH онкологиялық қызметтерді жабдықтау бойынша дамыту» қайырымдылық жобасы аясында Алматы, Астана қалаларында, Солтүстік Қазақстан облысы, Қарағанды және Абай облысы онкологиялық орталықтары үшін жаңа буынның желілік үдеткіштерін, компьютерлік томографтарын және басқа да соңғы жүйелерді сатып алу және орнату жоспарлануда.
Қазақстанның онкологиялық медициналық ұйымдарын ең озық медициналық құрал-жабдықтармен жарақтандыру қатерлі ісікпен ауыратын науқастардың табысты емделу мүмкіндігін айтарлықтай арттырады.
