2023 жылғы 26 маусымда «Қазақстан халқына» қоғамдық қоры Қамқоршылық кеңесінің кезекті бетпе-бет отырысы өтті. Келесі шешімдер қабылданды:
1. «Қазақстан Республикасында онкологиялық аурулармен күрес жөніндегі 2023-2025 жылдарға арналған кешенді жоспарға сәйкес онкологиялық аурулары бар азаматтарды дәрі-дәрмекпен қамтамасыз етуді қаржыландыру» бағыты бойынша тәсілдер бекітілді.
Қор Қамқоршылық кеңесінің 2023 жылғы 30 қаңтардағы шешімімен «Қазақстан халқына» қоғамдық қорының Қазақстан Республикасы Денсаулық сақтау министрлігі әзірлеген кешенді жоспардың жобасында көзделген іс-шараларды іске асыруға Қордың қатысуы алдын ала мақұлданды.
Бағдарлама бойынша Қор Қазақстан Республикасының азаматтарына қайырымдылық көмек көрсету шеңберінде геномдық зерттеулермен расталған және онкологиялық сырқат ерекшеліктері бар ісікке қарсы заманауи инновациялық құралдарды сатып алуды қаржыландыру сынды маңызды бағытты іске асырады.
Тәсілдер арқылы онкологиялық және онкогематологиялық аурулары бар азаматтарды тегін медициналық көмектің кепілдік берілген көлемі және міндетті әлеуметтік медициналық сақтандыру жүйесі шеңберінде мемлекет ұсынбайтын заманауи инновациялық мақсатты препараттармен қамтамасыз ету көзделген.
Көмек алушылардың нысаналы тобы: Қазақстан Республикасының онкологиялық және онкогематологиялық сырқаты бар азаматтар (18 жастан асқан).
Бүгінде азаматтардың осы санатын амбулаториялық деңгейде ісікке қарсы препараттармен қамтамасыз ету «Белгілі бір аурулары (жай-күйі) бар Қазақстан Республикасы азаматтарының жекелеген санаттарын тегін және (немесе) жеңілдікпен амбулаториялық қамтамасыз етуге арналған дәрілік заттар мен медициналық бұйымдардың тізбесін бекіту туралы» Қазақстан Республикасы Денсаулық сақтау министрінің 2021 жылғы 5 тамыздағы №ҚР ДСМ-75 бұйрығы негізінде жүргізіледі.
Алайда, бұл бұйрық негізгі терапияны және онкологиялық және онкогематологиялық ауруларды емдеуге арналған препараттардың шектеулі тізімін қамтиды, ал заманауи инновациялық таргетті препараттар мүлдем жоқ.
Таргетті терапия – онкологияны мақсатты емдеуге арналған дәрілік терапияның бір түрі. Дәстүрлі немесе стандартты химиотерапия рак жасушаларының бар-жоғына қарамастан бүкіл денеде тез өсетін жасушаларға бағытталған болса, таргетті терапия дәрі-дәрмектерді рак жасушаларының ерекшеліктеріне ғана бағытталады. Таргетті терапия рак жасушаларының көбеюін болдыртпауға немесе тоқтатуға және жаңа қатерлі ісік жасушаларының пайда болуына жол бермеуге арналған.
Дәрілік заттар деректері ұзақ мерзімді өмір сүру көрсеткіштерін арттыруға, оң ремиссияға қол жеткізуге, онкологиялық ауруы бар адамның өмір сүру сапасын жақсартуға, сондай-ақ мемлекеттің стационарлық көмекке, оның ішінде азаматтарды шетелге емделуге жіберу шығындарының бір бөлігін төмендетуге мүмкіндік береді.
Таргетті терапия емдеудің ерте кезеңінде емдеудің жанама әсерлерін азайтуға мүмкіндік береді: химиотерапия, сәулелік терапия және басқалар, сонымен қатар метастатикалық ісіктердің пайда болу ықтималдығының төмендеуіне әкеледі, ал онкогематологиялық аурулар кезінде сырқаттың тұрақтануы мен сауығып шығуға әкеледі.
Осы тәсілдерді іске асыру бойынша Қордың серіктестері – «Қазақ онкология және радиология ғылыми-зерттеу институты» АҚ, «Ұлттық ғылыми онкологиялық орталық» ЖШС, облыстардың, республикалық маңызы бар қалалардың және астананың әкімдіктері, өңірлік онкологиялық орталықтар, өңірлік онкологиялық орталықтардың рөлін атқаратын облыстық ауруханалардағы онкологиялық бөлімшелер.
Ұсынылған тәсілдер шеңберінде қайырымдылық көмек ісікке қарсы заманауи инновациялық құралдарға қол жеткізуді қамтамасыз етудің екі бағыты бойынша: амбулаториялық және стационарлық деңгейде көрсетілетін болады.
Қор дәрілік заттарбен қамтамасыз етудің екі бағыты бойынша мынадай тәсілдерді ұсынады:
1) Онкологиялық науқастар үшін дәрілік заттарды онкологиялық орталықтар арқылы қамтамасыз ету.
2) Ұлттық ғылыми онкологиялық орталық бақылауындағы онкогематологиялық науқастарды қамтамасыз ету.
Қазақстан Республикасының «Ұлттық әл-ауқат қоры туралы» Заңының 20-бабының 5-тармағына сәйкес «Самұрық-Қазына» ұлттық әл-ауқат қорынан түсетін түсімдер есебінен Қор қаржыландыруды жүзеге асырады. 2023 жылға ұсынылған дәрілік заттар тізіміне және ҚазОРҒЗИ мен Ұлттық ғылыми онкологиялық орталықтың науқастар саны бойынша болжамына сәйкес қаржыландырудың қажетті лимиті 17 млрд теңгені құрайды.
2. «Qazaqstan mektebine» қайырымдылық жобасын бекіту туралы» мәселесі бойынша Қор Қамқоршылық кеңесінің 2022 жылғы 26 желтоқсандағы №26 шешімінің күші жойылды деп танылды.
Жоба ынталандырушы жаңа білім беру ортасын құру, жаңа педагогикалық практикаларды енгізу, Алматы, Маңғыстау, Қызылорда, Түркістан, Жетісу облыстарында басқарушы командалар мен педагогтардың кәсіби құзыреттіліктерін кешенді түрде дамыту есебінен бес облыстың оқушылары үшін сапалы білім берудің қолжетімділігін арттыруды көздеді.
Қордың қайырымдылық жобаларын іске асырудың ішкі рәсімдеріне сәйкес Қамқоршылық кеңес бекіткеннен кейін жоба іске асыру кезеңіне өтеді, оның шеңберінде Тараптардың ынтымақтастығы туралы Меморандумға, жобаны іске асыру жөніндегі Жол картасына, бірлескен қызмет туралы шартқа және тауарларды/көрсетілетін қызметтерді жеткізу шартына қол қою қажет.
Қордың Басқарма мүшелері «EdCrunch Academy» заманауи білім беруді дамыту институты» ЖШС-мен бірлесіп Қор тұжырымдамасы шеңберінде ұсынылған жобаны іске асырудың ықтимал оңтайлы нысанын қарауға қатысты бірқатар кездесу өткізді.
Серіктес ұсынған Жол картасында Қор тарапынан берілген ескертулер мен ұсыныстар ескерілмеді және пысықталмады. Осыған байланысты Қордың қайырымдылық көмек көрсету Ережелеріне сәйкес құжаттарға қол қою бойынша дайындық жұмыстарының мерзімі аяқталды.
Жүргізілген жұмыстың қорытындысы бойынша Қор жобаны іске асыру бөлігінде бірқатар қауіп-қатердің барын атап өтіп, осыған байланысты жобаны іске асыруды тоқтату туралы шешім қабылданды.
