Отырыстың күн тәртібіндегі мәселелерді қарау қорытындысы бойынша Қордың Қамқоршылық кеңесі келесідей шешімдер қабылдады.
1. «Қазақстан Республикасының медициналық денсаулық сақтау ұйымдарын шетелде оқыту және шетелдік мамандарды тарта отырып шеберлік сыныптарын ұйымдастыру» бағыты бойынша тәсілдер бекітілді.
«Салауатты ұлт» әрбір азамат үшін сапалы және қолжетімді денсаулық сақтау» ұлттық жобасына сәйкес кадрлық әлеуетті және ғылыми медицинаны дамыту, әлемнің жетекші орталықтарында оқытылған дәрігерлер санын көбейту жалпыұлттық басымдық болып табылады.
Қор отандық медицинаға жаңа технологияларды, оның ішінде медициналық көмектің жоғары технологиялық әдістерін, шетелдік мамандардың тәжірибесін және елдегі медициналық көмектің деңгейін арттыру үшін үздік тәжірибелерді енгізу мақсатында ҚР Денсаулық сақтау министрлігі мен медициналық ұйымдардың өтініштері негізінде медициналық мамандарды шетелдік оқытуға жіберу және шеберлік сыныптарын ұйымдастыру үшін қаржылық көмек көрсетеді.
ҚР Денсаулық сақтау министрлігімен бірлесіп оқытудың мынадай бағыттары айқындалды:
- ана мен баланың денсаулығын сақтау;
- онкологиялық аурулар кезінде медициналық көмек көрсету, оның ішінде сәулелік терапия;
- трансплантология және трансплантациядан кейінгі күтім;
- реконструктивті медицина;
- нейрохирургия;
- медициналық генетика;
- ультрадыбыстық диагностика;
- денсаулық сақтау мамандары үшін қажетті басқа да өзекті бағыттар.
Бұл ретте шетелдік оқуға жіберілетін мамандармен шарт жасасу кезінде мемлекеттік медициналық ұйымдарда оқытылатын мамандық бойынша кемінде 3 жыл жұмыс істеу міндетті шарт болып табылады.
2. Жоғарыда аталған тәсілдерге сәйкес 2 жоба бекітілді – медициналық генетиктер мен ультрадыбыстық диагностика мамандарын шетелде оқыту және онкология және гематология бөлімшелерінің дәрігерлерін шетелде оқыту.
Бірінші жобаның мақсаты – нәресте өлімі мен мүгедектікті азайту үшін ұрықтың туа біткен ауытқулары мен перинаталдық нәтижелерді ерте диагностикалауды жақсарту. Оқыту халықаралық стандарттар негізінде жүкті әйелдердің пренатальды скринингін жақсартуға, клиникалық практикаға ультрадыбыстық пренатальды диагностиканың заманауи технологияларын енгізуге және олардың уақтылы диагностикалануына байланысты туа біткен кемістігі бар нәресте өлімін азайтуға бағытталған.
Онкология және гематология бөлімшелерінің дәрігерлерін оқытудың мақсаты – онкологиялық және гематологиялық аурулары бар балаларға медициналық көмек көрсету деңгейін арттыру, емделушілердің осы санатының диагностикасы мен терапиясын жетілдіру.
3. Қамқоршылық кеңес жыл сайын Қамқоршылық кеңес мүшелерін ротациялау аясында өз бастамасы бойынша жазбаша хабарлама негізінде Қамқоршылық кеңес мүшесі Роза Айтжанқызы Сүлейменованың өкілеттігін тоқтату туралы шешім қабылдады.
