Ұлытау облысында балаларға арналған екі қайырымдылық спорт залы ашылды

Ұлытау облысының Жезді және Талап ауылдарында балаларға арналған қайырымдылық спорт залдары ашылды. Залдар «Қазақстан халқына» қоғамдық қорының «24 балалар спорт залы» қайырымдылық жобасы аясында жарақтандырылды.

Екі зал орта мектептердің ғимаратында ашылды. Осыған дейін ауылдарда спортпен айналысу үшін қажетті заманауи орын болмады. Енді жергілікті балалар «қазақша күрес», бокс сынды секцияларына тұрақты қатысуына мүмкіндік алды.

«Залда барлық қажетті спорт құралдары бар. Бізге арнайы форма берілді. Мен бірінші рет қатысып жатырмын. Қуанышты болып отырмын. Жездіден шыққан балалар чемпион болады», – дейді Жезді ауылындағы орта мектеп оқушысы Нияз Қанатбек.

«Қазақстан халқына» қоры залдарды арнайы жабдықтар мен спорттық мүкәммалдармен жабдықтады. Қор бағдарламаны серіктесі «Батыр боламын!» қоғамдық қорымен іске асыруда.

«Ауыл – еліміздің алтын бесігі. Сондықтан ауылды жерде балалар үшін спортпен шұғылдануға жағдай жасау, адамгершілік тәрбиені қалыптастыру маңызды. Сонымен қатар, біз жаттықтырушылардың біліктілігін арттыру мақсатында оқыту және тәжірибе алмасу жүргізуді мақсат етіп отырмыз», – деп атап өтті ашылу салтанатында «Батыр боламын!» қоғамдық қорының вице-президенті Ернұр Сабыкенұлы.

«Қазақстан халқына» қорының жүзеге асырып жатқан «24 балалар спорт залы» жобасының мақсаты – еліміздің шалғайдағы елді мекендерінде немесе спортқа қолжетімділік деңгейі төмен ауылдық жерлерде балалар спортының қолжетімділігін арттыру. Жобаның мақсатты аудиториясы – аз қамтылған және көп балалы отбасылардан шыққан 5 жастан 18 жасқа дейінгі балалар, сондай-ақ даму ерекшелігі (инклюзивтілігі) бар балалар.  

Айта кетейік, 24 залды ашуға арналған қайырымдылық бағдарламасының бюджеті – 183 623 000 теңге. Бүгінгі таңда еліміз бойынша 11 зал ашылды: Ақмола облысы, Целиноград ауданы, Тасты ауылы; Алматы облысы, Ұйғыр ауданы, Ават ауылы; Маңғыстау облысы, Бейнеу ауданы, Бейнеу ауылы; Маңғыстау облысы, Бейнеу ауданы, Ақжігіт ауылы; Алматы облысы, Сарқан ауданы, Черкасск ауылы; Қарағанды облысы, Нұра ауданы, Ізенді ауылы; Алматы облысы, Еңбекшіқазақ ауданы, Қазақстан ауылы; Солтүстік Қазақстан облысы, Есіл ауданы, Покровка ауылы;  Түркістан облысы, Қазығұрт ауданы, Қақпақ ауылы; Ұлытау облысы, Ұлытау ауданы, Жезді ауылы; Ұлытау облысы, Жезқазған қаласы, Талап ауылы.

Сіз қиын өмірлік жағдайға тап болдыңыз ба?

Өтінім қалдырыңыз, Қор Сізге көмек көрсету мүмкіндігін табуға тырысады
© Социальный фонд «Қазақстан халқына»
С помощью Дизайн десант.
© «Қазақстан халқына» Қоғамдық қоры
Дизайн десант көмегімен.